Stafi i Qendrës së Parandalimit të Krimeve të të Miturve dhe të Rinjve (QPKMR) është trajnuar për përdorimin e Sistemit të Integruar të të Dhënave të Drejtësisë Penale për të Mitur, duke marrë njohuri të specializuara mbi procesin e saktë të hedhjes dhe menaxhimit të të dhënave në këtë platformë. Ky trajnim synon të përmirësojë cilësinë e informacionit të mbledhur dhe të sigurojë që të dhënat e lidhura me drejtësinë për të mitur të jenë të sakta, të plota dhe të përditësuara.

Ky hap është një pjesë e rëndësishme e përpjekjeve për të rritur transparencën dhe efikasitetin në mbikëqyrjen e rasteve të të miturve në sistemin e drejtësisë penale. Sistemi i të Dhënave i mundëson QPKMR-së të analizojë statistika të rëndësishme në nivel kombëtar, duke kontribuar në vendimmarrjen informuar dhe në përmirësimin e masave të drejta për të miturit.

Në bashkëpunim me UNICEF Albania, QPKMR ka krijuar gjithashtu një ekip trajnerësh të specializuar, të cilët do të mbikëqyrin zbatimin e saktë të sistemit dhe do të ofrojnë mbështetje të vazhdueshme për përdoruesit e rinj, duke garantuar që informacioni të jetë i sigurt dhe i përdorshëm në mënyrë efektive për nevojat e drejtësisë për të mitur.